लाडक्या गणरायाची मनोभावे पूजा केल्यानंतर घरगुती गणपतींसह सार्वजनिक मंडळांच्या गणपतींना आज निरोप देण्यात येणार आहे. गणपती विसर्जनासाठी मुंबई, पुण्यासह राज्यभर यंत्रणा सज्ज झालेली पाहायला मिळत आहे.
चौपाट्यांवर पालिकेसह पोलिसांकडून चोख व्यवस्था करण्यात आली आहे. बाप्पाची सेवा केल्यानंतर आज थाटामाटात बाप्पाच्या मुर्तीचे विसर्जन केले जाणार आहे. मुंबईत गणपती विसर्जनाची धूम पाहायला मिळत आहे.
महत्त्वाच्या ठिकाणी मोठा बंदोबस्त तैनात करण्यात आला आहे. विसर्जन मिरवणुकी दरम्यान वाहतूक कोंडी होऊ नये यासाठी वाहतुकीमध्ये देखील बदल करण्यात आला आहे. यासोबतच गणपती विसर्जनाच्या पार्श्वभूमीवर मुंबईतील काही मार्ग बंद ठेवण्यात आले आहेत.
यामध्ये कुलाबा नाथालाल पारेख मार्ग, काळबादेवी जे. एस. एस. रोड, कॅप्टन प्रकाश पेठे मार्ग, स्टर्न फ्री वे मार्ग, विठ्ठलभाई पटेल मार्ग, बाबासाहेब जयकर मार्ग, रामभाऊ साळगावकर मार्ग बंद राहणार असल्याची माहिती मिळत आहे.